GE EN
4 ადამიანი რომელიც უნდა გყავდეს ბენდში
19-07-2018
ნებისმიერ სფეროში, წარმატების მისაღწევად მნიშვნელოვანია მუდმივი მუშაობა, შესაბამისი ადამიანებით დაკომპლექტებული გუნდი და მათი მხარდაჭერა. ბენდის შემქნისას მუსიკოსების, როგორც ინდივიდების სწორად შერჩევა, შესაძლოა წარმატების მთავარი მიზეზი გახდეს. ცნობილი მუსიკოსების წარმატების მიღმა როგორც წესი, უდიდესი შრომა, საკუთარი საქმის სიყვარული, მეგობრები, თანამოაზრეები და ოჯახის წევრები დგანან. ინდივიდუალური მეცადინეობა და მუშაობა საკუთარ თავზე, უალტერნატივო კომპონენტია, რათა გამოიმუშავო ტექნიკა და პროფესიონალიზმი, მაგრამ ჯგუფებისა და მუსიკალური ბენდების შემთხვევაში, მნიშვნელოვანია, რომ თითოეული წევრი მეტწილად იზიარებდეს ერთმანეთის მსოფლმხედველობას და მენტალურ ღირებულებებს.
 
წარმოგიდგენთ ადამიანების 4 კატეგორიას, რომელიც მუსიკის სამყაროში მოგზაურობას, უფრო პროდუქტიულს და საინტერესოს გახდის:


1. ლიდერი

ადამიანების თუნდაც მცირე ჯგუფს, განურჩევლად ინტერესებისა, სჭირდება ლიდერი, რომელიც მათ მიმართულებას მისცემს, ცხადია ბენდების შემთხვევაშიც, ლიდერი მნიშვნელოვან როლს ასრულებს. განსაკუთრებით თუკი თქვენ დამწყები ხართ, ლიდერული და ორგანიზატორული თვისებების მქონე მუსიკოსი ჯგუფში, დაგეხმარებათ გაცილებით ეფექტურად დაგეგმოთ რეპეტიციების დრო და მიმართულებები. ესეთი ადამიანი, მოკლე დროში მოახდენს ჯგუფის წევრების მობილიზებას და ადაპტირებას საერთო ხედვებისა და მიზნების მიმართ.





2. პარტნიორი

ადამიანებთან ერთად დაკვრა, საინტერესო პროცესია და ერთ-ერთ მნიშვნელოვან როლს ასრულებს მუსიკოსის განვითარების პროცესში. თუმცა ასეთ შემთხვევაში, უმნიშვნელოვანესია პარტნიორული დამოკიდებულება და ის თუ რამდენად კარგად უგებთ ერთმანეთს მუსიკაში. რადგან შეუძლებელია, რომ ორი ადამიანი ზუსტად ერთნაირად უკრავდეს. კარგი პარტნიორის შემთხვევაში, შეძლებ აღმოაჩინო ინსტრუმენტზე დაკვრის ახალი მიგნებები და მიდგომები, ასევე დახვეწო საშემსრულებლო მანერები, გამოავლინო მეტი იმპროვიზაცია და მეტად იყო კონცენტრირებული შემოქმედებით განვითარებაზე.




3. ინსტრუმენტების გურუ

გიტარის სწორად აწყობა უკვე დამწყები მუსიკოსებისთვისაც არ წარმოადგენს განსაკუთრებულ სირთულეს. თუმცა სასურველი ჟღერადობის მისაღებად, სხვადასხვა ტექნიკური კომპონენტების გამოყენება აუცილებელია. სწორედ ესეთი მიდგომებისთვის სასურველია, რომ ბენდის ერთ-ერთი წევრი იყოს მუსიკოსი, რომელიც კარგად არის გარკვეული ტექნიკურ საკითხებში, რადგან სწორედ მისი დახმარებით შეძლებთ, გახადოთ ბენდის ჟღერადობა უნიკალური.




4. შთაგონების წყარო (მუზა)

მუზა შეიძლება აღმოაჩინო შენი შემოქმედებისთვის სრულიად განსხვავებულ და ერთი შეხედვით დაუკავშირებელ დეტალებშიც კი. და ის შესაძლოა სხვადასხვა ფორმით გამოვლინდეს მუსიკოსის შემოქმედებაში. მუსიკალურ სამყაროში, ხშირად საუბრობენ იმაზე, რომ არის სიმღერები და კომპოზიციები, რომლებიც გიტარის მიღმა არსებობენ და ინსტრუმენტთან შეხება, მათ გაცოცხლებას იწვევს. მუსიკოსები რიგ შემთხვევებში სხვა მუსიკოსების შემოქმედების გავლენით ქმნიან საკუთარს, რაც მათთვის უდიდესი ინსპირაციის წყარო ხდება. ბენდის ფორმაციის დროს, ცხადია მხოლოდ ისეთ ადამიანებზე ვერ გააკეთებ აქცენტს, რომლებიც შენს ინსპირაციას გამოიწვევენ, მაგრამ არსებობს რაღაც უხილავი კავშირი, რასაც ადამიანის პირველივე დანახვისას გრძნობ. შთაგონება, ურთიერთობებსა და ცხოვრებისეულ გამოცდილებას მოაქვს. ამიტომ როცა გადაწყვეტ, რომ ბენდი შექმნა, გვერდით ისეთი ადამიანები შემოიკრიბე, რომლებსაც შენსავით აღაფრთოვანებს ახალი აკორდის შემთხვევით აღმოჩენა.




მსგავსი სტატიები